سحر : مرحبا سمر كيفك وإيش عامله ؟
سمر : الحمدلله طيبة ، دوبنا أمس رجعنا من لندن
سحر : مره طولتي ،، من زمان عنك
سمر : يا بنتي كلها شهر وعدت زي الهوا
سحر : كمان يا شيخة لندن غالية ومصاريفها كتير
شهر بزيادة عليها
سمر : صح كلامك صرفنا بالشهر دا ربع مليون مابين مصاريف السكن والمشاوير والأكل
ولسه ما حسبت قيمة المشتريات بس ما تقل عن ربع مليون تانية
سحر : بس يا أختي طز بالفلوس ، أهم شي إنكم إنبسطوا
سمر : على قولتك ،، معاكي حق ، الفلوس إيش فايدتها إذا كنزناها
وما إنبسطنا فيها وإشترينا إللي نبغاه ونفسنا فيه .
سحر : طيب إسمعي لا ياخدنا الكلام دحين ، وتنسيني الهرجة اللي متصله عشانها
سمر : خير يا سحر في شي ؟
سحر : خير يا بنت الحلال إشبك إنفجعتي ههههه
سمر : ما إنفجعت :/
سحر : إسمعي فاكرة أختي قمر إللي تسعى بالخير
وتدور عن الناس الفقيرة وكده
سمر : إيوه ماشالله عليها
سحر : طيب إسمعي .. أمس قالتلي إذا أعرف أهل خير
يساعدوا أسرة ضعيييييفه مره وتحزن
أرملة مريضة دوبه زوجها مات وترك لها أيتام صغار
وصاحب البيت يبغى يطردهم لأنه عليهم متأخرات
والكهربا مقطوعة عليهم لأنهم ما سددوا الفاتورة
ومقطوعين من شجرة وما عندهم احد يساعدهم
سمر : ياحرااااام ، لا حول ولا قوة إلا بالله
سحر : وراحت أختي قمر زارتهم ، وشافت بيتهم
بيت شعبي من غرفتين صغار وهما 8 اشخاص
الأم و7 اطفال وعشان مافي كهربا البيت حر ورطوبة قاتلة
وظلام والأطفال يبكوا ما تدري من إيش ولا إيش
خايفين من الظلام ولا متضايقين من الحر ولا إنهم جيعانين
سمر : يا الله رحمتك
سحر : تبغي تساعديهم بشي ؟
سمر : أكيد يا سحر ، الحمدلله على النعمة
ودول أيتام ووصى عليهم الله ورسوله صلى الله عليه وسلم
ولازم نوقف معاهم ونساعدهم ، إيش حناخد من الدنيا إلا فعل الخير
ولازم نوقف معاهم ونساعدهم ، إيش حناخد من الدنيا إلا فعل الخير
سحر : جزاكي الله خير يا سمر عارفتك تحبي الخير
سمر : طيب أنا بعد يومين حقابلك باللوبي بفندق الهلتون
عشان ندردش شوية واوريكي شنطة LV اللي جبتها من لندن
وما كان في منها لا بجدة ولا بدبي
سحر : فاكرتك كنتي حتتجنني عليها وأتوقع ما رحتي لندن إلا عشان تشتريها
سمر : هههههههه عارفتني مجنونة
سحر : بكم إشترتيها ؟
سمر : نقريباً 48.000 ريال بعد ما رجعولي التاكس
سحر : هيَّا .. تخيلي لو نزلوها عندنا بسوق جدة
كان جبتيها ب 60 ألف ولا أكتر
سمر : من جد !!
سحر : طيب دحين خلينا بهرجة الأرملة المكروبة لأنهم
مساكين بدون كهربا وحالتهم حالة
سمر : أيوه صح مساكين ، شوفي لما نتقابل بعد يومين
نفطر سوى وأعطيكي اللي فيه النصيب وخلي قمر
توصله لهم وتقول للست تدعيلي بالإسم
سحر : جزاكي الله خير طول عمرك من المسارعين بالخيرات يا سمر .
سمر : الحمدلله ، لازم نعمل لآخرتنا وربنا يتقبل منا ومنك
وبالله يا سحر كلمي أختك تجيب ورقة فيها تفصيل إحتياجهم
ونشوف إيش ربنا يقدرنا نسوي معاها
سحر : بإذن الله ولا يهمك ، يالله باي
سمر : باي سحر ، تيك كير
_____
.. ( فاصل )
- الزمان : بعد يومين من المكالمة
- المكان : لوبي فندق هيلتون
- الطلبات : كوبين أمريكان كوفي ، قطعتين تشيز كيك
قارورتين موية صغيرة - ( الفاتورة بــ 200 ريال )
وبعد ساعة من المقابلة
_____
سحر : من زمان عنك وعن حكاويكي اللزيزة يا سمر
سمر : حتى إنتي لكي وحشه يا شيخة
سحر : أيوه افتكرت ، دي الورقة اللي طلبتيها مني
فيها كل تفاصيل الأسرة المسكينة
سمر : أيوه صح الله يذكرك بالخير ، أديني اشوفها
___
( تفاصيل الورقة ) ..
أرملة - و 7 أيتام
إيجار البيت الشعبي 1.000 ريال بالشهر
عليهم متأخرات 3 شهور بقيمة 3.000 ريال
فاتورة الكهربا المقطوعة 500 ريال
بيتهم تقريباً فاضي ومحتاجين أكل
وماعندها قيمة الأدوية حقتها وتتكلف 300 ريال بالشهر
الخلاصة :
تحتاج لمساعدة عاجلة بمبلغ مقطوع 3.500 ريال
وتحتاج لكفالة شهرية بمبلغ 1.500 ريال على الأقل
وتحتاج لكفالة شهرية بمبلغ 1.500 ريال على الأقل
_____
سمر : يا حرام ، الله يفرج عليهم
خدي دا الظرف وأديه لقمر تسلمه لهم ربي يفرج عليهم
ويتقبل مننا ،، المبلغ مو مره كبير بس حيساعدهم كتير إن شاء الله .
______
ملاحظة :
" مبلغ التبرع كان 300 ريال "
_______
سحر : خير وبركة ،،
ماشاء الله عليكي يا سمر جزاكي الله خير
سمر : وإيش رايك تكلمي صاحبتنا أمل سمعت إنها متكفلة بأسرة أيتام لها كم سنة معاهم
وبتحول لهم راتب شهري على حسابهم ، كلميها يمكن تتحمس وتكفل دي الأسرة كمان
براتب شهري يسد عنهم حاجتهم
سحر : صح عليكي ، والدال على الخير كفاعله
سمر : بيتها جمب الهلتون إتصلي عليها خليها تيجي دحين
سحر : صح وخير البر عاجله
_____
فاصل :
إتصلوا على أمل وما صدقت خبر وجات خلال 20 دقيقه
لأنها عرفت إنه سمر جايبه شنطة الـ LV آخر موديل
وعلى فكرة ,, الشنطة دي مصنوعة من جلد البقر
ونقشتها أبيض وأسود على نفس رقع جلد البقره
______
أمل " من بعيد " : هاااااااي بنااات
سحر و سمر : أهلييييين أمل
أمل : نورتي جدة يا سمر
سمر : النور نورك يا حبيبتي
سحر : إيش نطلبلك ؟
أمل : ميكاتو وإنجلش كيك
سمر : وأنا نشف ريقي من الكلام أبغى عصير برتقال
_____
فاصل :
" الفاتورة قفلت على 500 ريال "
وبعد ما شرحوا لأمل وضع الأسرة وحاجتها ...
_____
أمل : ياربي رحمتك ، جزاكم الله خير انكم بتحاولوا تساعدوها
بإذن الله حتكفل بيها شهرياً ، بس أدوني أسبوع يكون بدأ الشهر الجديد
وأكون رتبت أموري مع الأسرة القديمة اللي كافلتها
سحر : ولا يهمك خدي وقتك ، وربنا يتقبل مننا ومنك
______
فاصل :
سحر نسيت ظرف سمر أبو 300 ريال معاها وما أدته لأختها قمر الا بعد 10 أيام
وأمل أرسلت رسالة للأسرة القديمة التي إعتادت على كفالتها الشهرية منذ 3 سنوات
مفاد الرسالة .. أنها ستتوقف عن تحويل الكفالة لها لوجود أسرة أكثر حاجة منهم
وقررت أن تكون الكفالة للأسرة الجديدة " الأكثر حاجة "
بحسب ما سمعت من سحر وسمر
وبدأت بتحويل الكفالة 200 ريال في الشهر
وبعد شهرين من إعتماد كفالتها ..
إتصلت أمل على سمر
وبعد التحية والسلام وساعة ونصف من الكلام
دار بينهم الحوار التالي :
___________
....
سمر : يا أمل تتذكري الأسرة الفقيرة اللي جابتها لنا قمر أخت سحر ؟
أمل : أيوه الأسرة اللي كافلتها أنا ب 200 ريال في الشهر
سمر : عليكي نور ،، انتي بتحوليلها الكفالة بانتظام ؟
أمل : أيوه الحمد لله ، صحيح بتأخر عن التحويل كم يوم بس بالآخر بحولها
سمر : تعرفي إني يوم ما اتقابلنا ديك المرة
كنت مدية مبلغ مقطوع مساعدة لنفس الأسرة ؟
أمل : ماشالله عليكي جزاكي الله خير
سمر : لا أنا ما بتمنن ، بس إنه بقولك عن شي
أمل : خير ؟؟
سمر : أنا يومتها أرسلت لها 300 ريال وإنتي كفلتيها ب 200 ريال بالشهر
أمل : طيب ؟ رزقهم إيش فيها ؟
سمر : تعرفي إنه الأرملة دي راسلة رسالة تطلب فيها مساعدة إضافية !!!!
تقول إنها انطردت من البيت عشان المتأخرات اللي عليها ودحين هيا متهجولة مع أيتامها
كل يوم في بيت من بيوت جيرانها ،، وما أحد متحملها منهم ،،
لأنه عندها 7 اطفال وهما بيوتهم صغيرة وفيهم اللي مكفيهم
فيطردوها وتروح بيت تاني ,, ودحين ماحد راضي يسكنهم عنده لحد ما تسدد
فيطردوها وتروح بيت تاني ,, ودحين ماحد راضي يسكنهم عنده لحد ما تسدد
وترجع بيتها ، وكمان تقول إنه لو رجعت فالكهربا مفصولة لسه وما سددت الفاتورة
أمل : لا حول ولا قوة الا بالله ، عشان كده الناس دي فقيرة ما تعرف تدبر أمورها المالية
سمر : لا يا فالحة ،، بس شكلها طمعت وتبغى فلوس زيادة ، الله يهديها
أمل : يعني إنتي ساعدتيها بمبلغ مقطوع ، وأنا بحول لها كفالة من شهرين ولسه محتاجة ؟
سمر : والله ما أدري عنها ، بس للأمانة حبيت أبلغك عشان لا أكون السبب إنك بتعطي صدقة شهرية
لوحدة طماعة او نصابة .
أمل : شكراً يا سمر ، ربنا يدينا على قد نيتنا ، إحنا كلنا كنا نبغى الأجر ونسوي خير
بس ما طلعت تستاهل ، وأنا حوقف عنها الكفالة وكويس نبهتيني قبل ما أحول لها الشهر دا
سمر : الله يعافيكي يا قمر
أمل : قمر أخت سحر ؟ خخخخخ
سمر : هههااااي
أمل : كنت أبغى أسألك ،،، بما انك دوبك راجعة من دبي
فين حجزتي وبكم الليلة ؟ لأني طالعة بعد أسبوع ولسه ما حجزت الفندق
سمر : أخدنا فيلا بمنتجع خطير بجزيرة النخلة ، الأسبوع ب 25 الف ريال
بس يستاهل أكتر
.... أمل : روعة ،، بالله أرسليلي تلفونهم عشان الحق أحجز
..... إلخ
____________
لم تنتهي القصة
لكني إنتهيت من روايتها
,,,, وتستمر الحياة
ملاحظة :
القصة والأسماء وهمية وليست حقيقية
عشان لا أحد يفهم غلط ويزعل مني :)
ولكن سامح الله " بالي "
فقد طرأ عليه هذا السيناريو بلا إستئذان
فقد طرأ عليه هذا السيناريو بلا إستئذان
وللأمانة ...
فإن أكثر أهل الخير إلتزاماً وإهتماماً وإستمرارية
هم من فاعلات الخير أنسات وسيدات ..
وما يهونوا رجال الخير
وكل عام وأتتم بخير
ومن أهل الخير :)
ومن أهل الخير :)
______________
محمد عبد العزيز المكوار
15 - 7 - 2015 م
15 - 7 - 2015 م
